O Concello de Boiro vén de organizar unha serie de actividades para conmemorar o Día do Libro, que se celebra o 23 de abril. As Bibliotecas Municipais e as pertencentes aos diferentes centros do ensino do municipio participarán de forma activa nesta iniciativa.
A concelleira de Cultura, maría Outeiral, presentou esta mañá as actividades, entre as que se atopa a creación dun grupo de traballo formado po tódalas bibliotecas do municipio e escolas co fin de difundir a lectura. Os máis cativos serán os protagonistas e involucraranse en todas estas accións que se están a organizar.
O venres 23, que se festexa o Día do Libro, vaise presentar un vídeo que leva por título Boiro le e que está gravado coa colaboración do alumnado do concello. Tamén se vai levar a cabo a edición dunha publicación impresa cos microrrelatos que leven a palabra “libro”. Cada centro poderá enviar oito textos como máximo e poderán facelo ata o venres, para encher a publicación que se presentará ao remate do curso.
Ademais da Biblioteca Municipal de Boiro e a Axencia de Lectura de Escarabote, nesta iniciativa participan tamén as bibliotecas dos colexios públicos de Escarabote, Cespón, Abanqueiro, Praia Xardín, Santa María do Castro e Santa Baia, os institutos de educación secundaria A Cachada e Praia de Barraña e a Biblioteca Safo do IES Espiñeira.
