O Concello da Pobra do Caramiñal emitiu este 26 de abril un comunicado no que o Executivo local expresa as súas discrepancias respecto do nivel de restrición que lle está a ser adxudicado ao municipio estes días en materia de COVID, que é de restrición máxima. No comunicado, o Concello recorda as graves consecuencias sociais e económicas que está a implicar esta resolución do Comité Clínico (o órgano que asesora a Xunta na xestión da pandemia), xa que, en palabras do Consistorio, “a evolución no número de cosas é positiva”.
Segundo reflicte o Concello logo de pedir explicacións ao Comité, a decisión deste órgano viría dada non só polas taxas de incidencia a sete e catorce días senón tamén pola “evolución do número de casos e as características dos abrochos que se están a producir, e que fan que a situación sexa considerada como de maior risco de transmisión dentro do concello e tamén difundirse a territorios limítrofes”. O Concello reflicte que o se ben o Comité recoñece que a evolución “está a mellorar moito”, preocúpalle, afirma este órgano asesor, “que se estea a desenvolver un abrocho cun número importante de casos e que se difundiu, ademais, a outros concellos”, un proceso de contaxio no que se “terían identificado dúas variantes do virus tradicional con maior transmisibilidade, que poden poñer en risco o control da incidencia no concello”.
A respecto de todo isto, se ben a Administración local manifesta que respecta as decisións adoptadas á espera do que o Comité Clínico decida na reunión deste martes, lembra que a situación no 26 de abril de 2021 é a seguinte:
• O número de casos diagnosticados a 14 días sitúase nos 22, cunha incidencia acumulada por cada 10.000 habitantes de 236, dentro do intervalo entre 150 e 250 casos, que situaría o noso concello no nivel de restrición media.
• A 7 días a incidencia acumulada sitúase entre 25 e 75 casos por cada 100.000 habitantes, cun número de casos diagnosticados neste período entre 1 e 9. A valoración de maneira independente deste dato situaríanos no nivel de restrición media-baixa.
