Os representantes do BNG ribeirense mantiveron unha xuntanza con colectivos veciñais para estudar o Plan Reitor de Usos e Xestión (PRUX) do Parque Natural de Corrubedo e Lagoas de Carregal e Vixán que vén de presentar publicamente a Xunta. Os concelleiros Xosé Vázquez e Luís Pérez e o responsábel local de ecoloxismo Vicente Paz debateron acerca do plan con José Martinez, voceiro das persoas con terreos no parque, e con Manuel Reiriz, presidente da comunidade de Montes de Artes. O BNG aproveitou a reunión para pedir aos gobernos autonómico e local que atendan as demandas da veciñanza “ao tempo que activan medidas para revitalizar o parque natural”.
Os representantes dos colectivos veciñais expresaron aos membros do Bloque a súa preocupación por cuestións como o futuro que lle garda ás terras de labranza da contorna, que serán obxectivo das “máximas restricións”. Tamén mostraron a súa inquietude acerca da “falta de axudas para poder dedicarse aos labores tradicionais e de investimentos que manteñan o parque en bo estado”. Amais, laiáronse de non ter participado activamente na elaboración do plan.
Desde o BNG consideran que o documento presentado pola Xunta chega “tarde, mal e arrastro por tres razóns”. Segundo sinalaron, “chega tarde porque o documento debería estar aprobado pouco despois de protexerse a zona en 1992, chega mal porque ten eivas importantes que non responden ás demandas históricas da poboación e chega arrastro porque nin tan sequera se falou coa veciñanza que posúe terreos na zona protexida”.
Para o concelleiro Luís Pérez Barral, presentar un documento sen participación dos colectivos ambientais e sociais “é un erro de partida” e asegura que a Xunta “pretende aprobar o documento pola porta de atrás” ao deixar tan só 15 días para presentar alegacións é “síntoma do pouco que lle importa ao PP a natureza e os problemas que lles provoca á veciñanza as eivas que presenta o PRUX e a falta de investimentos” asegura o edil.
A formación nacionalista, acusa directamente o Partido Popular pois “alén de estar gobernando na Xunta e no Concello de Ribeira, é un dos seus membros o que preside a Xunta Consultiva do Parque”. E engadiron: “Se o parque está sumido nun absoluto estado de abandono, non hai investimentos suficientes e se esquecen as demandas veciñais, é por culpa da inacción do PP e dos seus membros en todos os órganos”.
Pérez Barral avanzou que o BNG vai rexistrar alegacións que poden resumirse en 3 eixos fundamentais: “Máis investimentos para conservación da natureza, resolver as demandas formuladas polos colectivos veciñais e promover actuacións que revitalicen a zona natural”.
