O pasado 16 de abril os deputados Rosana Pérez e Luis Bará participaron nunha visita á planta de tratamento de residuos sólidos urbanos da Mancomunidade de Concellos Serra do Barbanza. Á visita ás instalacións de Serbia, en Lousame, acudiron tamén representantes do BNG da nosa comarca, que tiveron oportunidade de coñecer os últimos avances da planta en materia de xestión de refugallos, así como as súas principais demandas para lograr o mellor funcionamento posíbel en liña cos obxectivos de reciclaxe determinados pola Unión Europea.
Pérez e Bará lembraron que “é preciso apostar e investir no modelo de tratamento que se leva a cabo por parte da mancomunidade”, e puxeron o foco “na necesidade de compromiso político para o seu bo funcionamento. Fronte a isto, criticaron “o modelo maioritario en Galiza baseado na combustión do RSU, cos graves problemas ambientais que xera”, e salientaron “os beneficios da compostaxe”, así como “o carácter pioneiro que esta entidade tivo na súa formación e o indispensábel de seguir apostando por este modelo”. Amais, quixeron enxalzar o importante papel xogado pola planta en materia de emprego, “posto que actualmente, máis de 150 persoas dos
concellos vinculados á mancomunidade traballan no complexo medioambiental, supoñendo un dos principais sectores da contorna”.
