O pasado 14 de xaneiro subiuse ao Youtube un vídeo-clip, o novo vídeo musical da histórica banda galega Os Resentidos, que incluía deseños elaborados por un mozo de Porto do Son, Antón Romero, que, ademais, foi o ilustrador da cuberta do traballo musical que representa o regreso (tras anos de separación) do grupo á primeira liña da música en galego, o disco Organización Nautilus.
Este 21 de abril presentouse oficialmente este novo traballo e no transcurso do acto houbo palabras para louvar o importante traballo despregado por Antón, artista sonense de 14 anos con Trastorno do Espectro Autista que recreou coas súas ilustracións unha manchea de referencias á cidade de Vigo, algunhas actualmente visíbeis (como a ponte de Rande) e outras máis directamente ligadas á fantasía e á imaxinación (submarinos, barcos pirata ou animais mariños como baleas ou luras xigantes).
Na presentación participaron o conselleiro de Cultura e Educación, Román Rodríguez, e o secretario xeral de Política Lingüística, Valentín García. Por certo que o vídeo-clip en cuestión xa conta con case 4.000 reproducións en Youtube.
