A Comunidade de Montes de Baroña organizou esta fin de semana unha xornada para achegar recursos de utilidade á veciñanza cos que loitar fronte á vespa asiática, unha especie invasora que está a causar dende hai anos graves prexuízos á poboación local de abellas e vespas.
A actividade, na que participaron os membros de Protección Civil de Porto do Son, consistiu nun obradoiro no que se compartiron “receitas” moi sinxelas para combater as velutinas, receitas das que calquera pode botar man.
Por exemplo a elaboración de trampas que calquera propietario de montes ou leiras pode instalar de xeito doado, xa que para a súa construción precísanse materiais de uso tan común como garrafas de plástico, auga ou azucre. Estas trampas, segundo se fixo saber, son moi indicadas para as áreas onde haxa explotacións de mel, xa que as velutinas adoitan concentrarse nas proximidades das colmeas para cazar as abellas.
