O Concello da Pobra informou de que esta semana arrincaron os labores para acondicionar o parque infantil do Castelo, poñendo a punto os seus xogos e co obxectivo de “ofrecer ás crianzas unhas mellores instalacións para o seu uso e desfrute”.
A Concellaría dos Servizos Municipais, da cal é titular a edil Estefanía Ramos (Nós Pobra), explicou que a intervención “ten unha duración de dez días”, durante os cales efectuaranse “numerosos labores que inclúen a lixado, a aplicación dun tratamento antióxido e a pintura das estruturas metálicas, a substitución de parafusos e a reposición dos tapóns, o cambio das cadeas e asentos das randeeiras, así como a revisión dos eixos e dos resortes, entre outros”.
No que respecta ao equipo combinado de integración, procédese coa reposición de tapas, e co lixado e posta punto das plataformas; mentres que no equipo combinado do Castelo realízase o lixado, o tratamento antióxido e a repintadura das partes metálicas desgastadas ou enferruxadas, a limpeza de todas as pintadas, a retirada da chapa de madeira e a reposición do metacrilato translúcido, así como volver marcar o xogo do tres en raia.
As tarefas están sendo executadas pola empresa HPC Ibérica S.A. por un importe de 3.190’77 euros, IVE incluído, con cargo ao orzamento municipal.
É unha actuación que se desenvolve coincidindo co peche dos parques infantís e biosaudábeis de todo o termo municipal da Pobra do Caramiñal debido á situación epidemiolóxica derivada da COVID-19, o cal se recolle no bando da alcaldía do día 3 de abril.
