Mar achegará en Ribeira 90 novas prazas de amarre

Este 21 de abril a conselleira do Mar estivo en Ribeira para, entre outras cousas, verificar o desenvolvemento das obras de reordenación interior da lámina de auga do peirao de Ribeira. Na localidade fixo saber que estes traballos “permitirán poñer a disposición do sector marítimo-pesqueiro local 90 prazas de amarre”. Tamén lembrou que os traballos contan cun investimento de 1,2 millóns de euros a través de Portos de Galicia. Noutra orde cousas, tamén fixo saber que haberá campaña de vacinación para mariñeiros, tal e como reflectimos onte dende O Barbanza.

A titular de Mar, que estivo acompañada pola presidenta do ente público, Susana Lenguas, explicou que as obras inclúen a ampliación dos peiraos flotantes de descarga para buques pesqueiros (terceira lista), dos das embarcacións auxiliares de acuicultura (cuarta lista) e das náutico-recreativas (sétima lista) así como o traslado do dique flotante e a instalación doutro para embarcacións institucionais.

Esta última infraestrutura xa está colocada, lembrou, engadindo que “conta con catro prazas de amarre para embarcacións institucionais como as do Servizo de Gardacostas de Galicia ou as de Salvamento Marítimo do Estado”.

Mentres, a ampliación do resto dos peiraos suporá a creación doutras 86 prazas de amarre, das que 75 se corresponderán con embarcacións pesqueiras, oito serán para auxiliares de acuicultura do sector bateeiro e tres para barcos de lecer.

Ademais da ampliación de prazas, o proxecto prevé a dotación de torres de subministración e iluminación aos pantaláns con sistema intelixente de control de consumos.

A maiores, engadiu, habilitaranse torres de subministración eléctrica de alta capacidade ao peirao situado fronte á lonxa vella e máis un sistema de control de accesos nos portalóns dos peiraos flotantes que funcionará a través do teléfono móbil.