As andainas de Outes para coñecer o patrimonio local, convocadas polo Concello, están a ser un éxito de participación. Segundo confirmaron dende o Consistorio, xa están cubertas todas as prazas para a primeira das rutas, Historia e espiritualidade en Roo, que está prevista para este domingo. O Concello tamén lembra que “se algunha das persoas inscritas non pode acudir, que o comunique para permitir a participación doutras e doutros camiñantes”.
A ruta deste domingo forma parte da iniciativa Camiñando o noso patrimonio, que sae de partida con tres percordidos abertos á participación de residentes e visitantes.
A primeira camiñada é a de Historia e espiritualidade en Roo. Celebrarase como dixemos este 2 de maio, a partir das 10.00 horas e con saída da Igrexa de Roo. Serán seis quilómetros de percorrido presentando dificultade moderada.
A segunda ruta, Camiñando cara a orixe do concello de Outes, será o 16 de maio, con saída da Eira do Carme (Brión de Arriba) ás 9.00 horas. Serán 9 quilómetros de camiñada, con dificultade moderada.
A terceira andaina, A Torre dos Muros e Fervenzas de San Paio, está programada para o 30 de maio. Será ás 10.00 horas, con saída na Igrexa de San Lourenzo. A distancia a percorrer é de 6,3 quilómetros (dificultade moderada).
As prazas por quedada serán limitadas: 25 por cada ruta.