En Rianxo premiaranse as compras locais polo Día da Nai con 250 euros en premio

A Asociación Rianxeira de Empresarios (ARE) presentou os detalles da súa campaña comercial do Día da Nai, o vindeiro 2 de maio. A entidade, que quere converter a data nun novo e importante chamamento a pecharmos fileiras arredor do noso comercio, sinalou que está previsto repartir 250 euros en primeiros, cun vale de 150 e outros dous de 50. Este 13 de abril dará comezo a campaña entre os asociados da entidade baixo o cancelo #diadanairianxo.

Segundo fai saber a ARE, repartiranse rifas numeradas por cada compra nos establecementos asociados á compaña. As e os clientes deberán conservar e gardar estas rifas para comprobar se resultan gañadoras ou gañadores (que se anunciarán o vindeiro 5 de maio). Ademais, de faceren as compras na plataforma online Mercarianxo tamén serán incluídas as rifas no sorteo. As bases legais están dispoñíbeis na Rede para a súa consulta.