Celada de Antonio Piñeiro preséntase este 30 de abril no Auditorio de Ribeira

O autor de Ribeira presentándonos os detalles doutra das súas obras recentes: A través do fume

Este 30 de abril vaise presentar en Ribeira unha das grandes novidades editoriais da pasada tempada no ámbito das letras galegas: a novela Celada do escritor local Antonio Piñeiro. O acto virá da man da Concellería de Cultura do Concello de Ribeira, a Editorial Xerais de Galicia, a Asociación Cultural e o xornal La Voz de Galicia. Como lembraremos, Celada, editada por Xerais, foi a obra gañadora da sétima edición do Concurso Internacional de Novela Curta Cidade Centenaria de Ribeira. O acto de presentación está previsto ás 20.00 h no Auditorio Municipal.

Intervirán, mais do autor, María José Sampedro, concelleira de Cultura, Francisco Alonso Villaverde, director de Xerais, e Manuel Ruíz Rivas, alcalde de Ribeira.

A Concellería de Cultura de Ribeira agasallará aos asistentes cun exemplar da novela (ata esgotar existencias).

Para acudir á presentación cómpre reservar localidade/es en culturaefestexos@ribeira.gal, do 26 ao 30 de marzo, ás 14.00 h. É necesario indicar, de todas as persoas para quen se solicita: nome completo, teléfono de contacto e, de ser o caso, se son conviventes (a reserva será efectiva unicamente cando se confirme dende o correo da concellería de Cultura de Ribeira).

A novela

Celada, a obra gañadora da sétima edición do Premio de Novela Curta Cidade Centenaria de Ribeira, foi unha das grandes sensacións literarias da pasada tempada no ámbito das nosas letras, en boa medida porque supón un novo exemplo da depuración do estilo particular de Antonio Piñeiro, autor que domina á perfección a cualidade de entreter ao lector ao tempo que lle ofrece unha prosa innovadora coma poucas. Celada sitúanos nos anos setenta, unha década se fondas transformación sociais e políticas na que ferven as revoltas universitarias, como por exemplo as protagonizadas en Compostela pola mocidade activista que enchía daquela os campus e as facultades. A novela de Antonio Piñeiro pon o foco nunha destas accións de mobilización, que está a piques de ser desbaratada por redada policial comandada polo inspector Alaín.