A agrupación Boiro Novo que coordina Dores Torrado vén de emitir un comunicado no que mostra o seu malestar “pola cancelación inxustificada do pleno ordinario de abril”. E engaden: “Lamentamos que o PSOE volva as mesmas dinámicas que criticabamos na anterior lexislatura do PP, cancelando plenos arbitrariamente e sen xustificación real”.
A agrupación opina que os motivos achegados polo Goberno local para suspender a sesión, motivacións relacionadas coa seguridade da COVID-19, “non son suficientes para ter tomado tal decisión”, e máis cando, indican, existen uns servizos tecnolóxicos dos que se leva botando man dende hai tempo para garantir a protección das e dos participantes e da cidadanía: “Dende Boiro Novo non temos constancia de que a COVID mutase e pasase de ser un virus biolóxico a ser un virus de transmisión informática, polo que non entendemos que a sesión non se poida celebrar a lo menos de xeito telemático como se viña facendo ata agora, tendo en conta ademais que o Goberno non cancelou a sua axenda de actos públicos”.
E engaden: “Seguimos carecendo de orzamento municipal, o que fai que a día de hoxe continuemos executando as partidas das contas prorrogadas do PP; dende Boiro Novo fixemos hai máis dun mes unha serie de propostas para ese, de momento, inexistente orzamento que terán que agardar outro mes máis para recibir resposta, xunto con varios rogos e preguntas que nos trasladou a veciñanza e que tamén quedarán pendentes de ser debatidos no pleno por culpa desta decisión totalmente arbitraria do Goberno local”.