A única sucursal bancaria que hai en Escarabote pode pechar despois de que se comunicou aos clientes a intención da entidade e os veciños da localidade xa empezaron a mobilizarse para mostrar o seu malestar.
O executivo boirense trata de evitar que os residentes no núcleo queden sen os servizos da oficina. Desde o consistorio xa se realizou unha solicitude formal á entidade financeira para demandar que manteñan activas as súas instalacións, e a próxima semana está prevista unha reunión para tratar este asunto.
Fontes municipais destacaron que Escarabote é un dos núcleos con máis poboación do municipio boirense e comparte cos veciños que a decisión de pechar a oficina de Abanca na localidade ocasiona un importante prexuízo aos clientes da entidade ao verse privados dos servizos que presta a sucursal para a realización de xestións cotiás.
O pasado día 21, o Concello trasladou a Abanca o malestar existente en Boiro por esta situación e o alcalde reiterará a próxima semana na reunión que ten previsto manter co máximo representante da entidade bancaria na zona, o director territorial en Santiago, a necesidade de mantela oficina.
