Aumenta a presión nas UCI galegas e baixa na de Santiago-Barbanza


Os pacientes de Covid nas UCI galegas aumentan en cinco, chegando a un total de 31 e aumentando a presión, mentres que as persoas ingresadas a causa do virus noutros réximes hospitalarios descenden ata as 183 camas ocupadas en total, unha ducia menos que 24 horas atrás. Os novos contagios detectados baixan dos 200, pero a taxa da positividade das PCR repunta ata o 3,1%

A baixada na presión hospitalaria (fóra de coidados intensivos) débese á caída rexistrada nos pacientes en planta, que pasan a 152 (17 menos). Mentres tanto, os casos activos da enfermidade seguen á alza por novena xornada consecutiva, ata alcanzar os 2.590 pacientes, de acordo cos datos ofrecidos este sábado pola Consellería de Sanidade, actualizados ás 18,00 horas do venres.

En Santiago-Barbanza, os ingresados sitúanse nos 24 (-5), dos cales tres se manteñen en coidados intensivos. No resto das área sanitarias mostran unha baixada da presión hospitalaria en seis das sete zonas, fóra de Pontevedra-O Salnés, aínda que hai que ter en conta que en ningunha delas os pacientes en UCI descenden, senón que soben ou se manteñen. Na área da Coruña-Cee, os ingresados baixan en tres, ata os 60 en total, aínda que os críticos soben nun, ata os oito. Unha tendencia similar segue a de Vigo, que contabiliza 34 enfermos hospitalizados (catro menos), dos que cinco (un máis), están na UCI. En Ourense-Verín-O Barco, hai 20 hospitalizados (-1), dos que seis (+1) están críticos; en Lugo-A Mariña-Monforte hai 10 ingresados en total (-1), tres deles (sen cambios) en coidados intensivos; e Ferrol, con seis hospitalizados, segue comoa única área coas UCI libres de Covid.