A Asociación Ambar, con sedes en Ribeira e na Pobra, presentará o Banco de Recursos EduDiversa o próximo 3 de maio, ás 19:00 horas. Esta iniciativa online celebrarase con motivo da Semana Internacional da Educación e o Día da Convención dos Dereitos das Persoas con Diversidade Funcional.
O Banco de Recursos EduDiversa é unha iniciativa enmarcada no programa de educación inclusiva que nace para facilitar a tarefa dos profesionais docentes na procura dos recursos que mellor se adapten ás características do seu alumnado. De feito, o banco conta con recursos multiformato, concretamente con aplicacións, programas informáticos educativos, recursos en liña, vídeos e material descargábel. Tamén con consellos, pautas e materiais didácticos sobre atención inclusiva destinados a persoas con e sen diversidade funcional. Estes están apoiados na experiencia dos e das profesionais de Ambar. Doutra banda, ten normativas e protocolos de interese, así como novidades no ámbito da investigación educativa e psicopedagóxicas, convocatorias de formacións e proxectos inclusivos de eficacia probada.
En concreto, a formación ofertada sobre accesibilidade será impartida por Lydia Parga, terapeuta ocupacional de Ambar e responsábel do proxecto Terapia Ocupacional con impresión 3D, que se celebrará no mes de xuño e será de balde. A maiores, haberá unha xuntanza online guiada por María Gómez, mestra e especialista en atención á diversidade funcional de Ambar.
Xa con anterioridade, leváronse a cabo enquisas durante a fase de investigación para ver as necesidades de apoio en atención á diversidade na comarca. Na primeira edición do proxecto formouse a un total de 72 profesionais en atención á diversidade. As temáticas das formación foron o Trastorno do Espectro Autista (TEA), Trastorno por Déficit de Atención con Hiperactividade (TDAH), Diversidade Funcional Sensorial Auditiva e Lingua de Signos Española (LSE) e Trastornos de Conduta en época de pandemia.
