A Policía de Rianxo tramitou no primeiro trimestre de ano 121 propostas de sanción por infraccións sanitarias

A Policía Local de Rianxo compartiu o seu balance de actividades relativo ao primeiro trimestre do ano, un informe que ten un claro protagonismo da COVID-19 e das medidas levalas a cabo para pórlle freo no termo municipal. No balance faise saber que ao abeiro das tarefas inspectoras relacionadas co traballo anti-COVID e coa seguridade viaria controláronse un total de 2.784 vehículos e identificáronse 876 persoas.

Dentro da campaña de control de hostalería segura, efectuáronse un total de 492 inspeccións en establecementos hostaleiros en todo o termo municipal. Amais, leváronse a cabo 157 denuncias administrativas en materia de tráfico 17 por condución baixo os efectos de sustancias estupefacientes e 4 por condución baixo a influencia de bebidas alcohólicas. A maiores, instruíronse 15 atestados por delitos contra a seguridade viaria chegando a detectarse a 4 condutores sen permiso vixente, 10 por alcoholemias positivas e 1 por exceso de velocidade.

En materia sanitaria, os axentes rianxeiros tramitaron 121 propostas de sanción por infraccións relacionadas co control da pandemia, 74 por non uso ou uso incorrecto da máscara de protección, 38 por incumprimento das restricións de mobilidade, 4 por exceso no aforo de reunións, 3 por desprazamentos non xustificados, 1 por consumo de tabaco fóra dos casos permitidos e 1 por incumprimento de medidas na hostalería.

Dende a Policía Local lembran tamén que farán un chamamento á cidadanía para “extremar as medidas preventivas de control da pandemia responsabilidade individual de todas e todos para frear novos contaxios e reducir o seu espallamento”.