A semana pasada culminaron en Taragoña e Asados (Rianxo) os obradoiros de regueifa do certame Enreguéifate 2021, un programa de dinamización lingüística impulsado por cinco Concellos galegos (Santiago de Compostela, Ames, Teo, Pontevedra e Rianxo) para reivindicar a improvisación oral galega, unha longa tradición de retruque verbal e musical que salienta non só polos séculos que ten ás súas costas, senón tamén polos importantes ingredientes de imaxinación, humor e creatividade que pon en xogo.
Por certo que os responsábeis do popular espacio Fun polo Aire, da TVG, quixeron achegarse ás regueifas da rapazada local e plasmárono nun programa trala visita ao CEP Brea Segade de Taragoña.
A maiores, dende Normalización Lingüística do Concello e o dito centro educativo informaron de que en breve serán achegados á Rede novos audiovisuais coas respostas ás regueifas que chegaron de Rianxo.
O xoves 22 de abril celebrouse no CEP Brea Segade de Taragoña o último dos obradoiros escolares de regueifa impartidos por Lupe Blanco e Josinho da Teixeira no Concello de Rianxo. Participaron as nenas e nenos de quinto e sexto de Primaria.
Obxectivos do programa
O obxectivo é achegar os recursos precisos para que as novas xeracións se reencontren cunha das fórmulas creativo-comunicativas máis antigas, tradicionais e singulares da nosa terra: a regueifa. Por iso, inclúe accións formativas para alumnado e profesorado, un certame regueifeiro e un encontro anual de improvisación oral galega.
Os Concellos devanditos explican que “a regueifa amosouse nos últimos anos como unha ferramenta idónea para fomentar o uso do galego entre a mocidade, debido á semellanza que este canto improvisado ten con outros formatos prestixiados socialmente nesas idades: rap, batalla de galos…”. As entidades organizadoras salientan tamén o potencial desta tradición oral para impulsar e enriquecer o audiovisual galego.
