A Deputación financia a contratación de técnicos de deportes nos concellos da nosa comarca

O BOP vén de publicar a concesión definitiva das axudas da Deputación da Coruña para a contratación de persoal técnico deportivo nos concellos da provincia. Este ano, sesenta e nove concellos contratarán ou manterán no seu cadro de persoal a técnicos deportivos municipais.

En total, repartiranse 905.000 euros. Concretamente, a área de Santiago terá unha axuda de 282.500 euros, mentres que a de A Coruña e as Mariñas, contará coa metade, uns 162.500 euros. Na mesma liña, a comarca de Ferrolterra posuirá 150.000 euros e a Costa da Morte 170.000 euros. En Barbanza achegaranse 140.000 euros para poder levar a cabo este programa (todos os concellos recibirán 15.000 euros agás Outes e Porto do Son, que percibirán 10.000.

A deputada responsábel da área de Deportes, Cristina Capelán, destacou que estas axudas “ademais de contribuír á xeración de emprego na provincia, facilitan tamén que os municipios coruñeses poidan desenvolver programación deportivas de carácter estable e fomentar o deporte e a actividade física entre a poboación, especialmente nenos e maiores”. Deste modo, a Deputación financiará ata o 80% dos custes salariais do persoal técnico deportivo contratado durante un ano, cunha achega máxima de 15.000 euros para aqueles municipios que optan pola contratación dun graduado universitario en Ciencias da Actividade Física e o Deporte que traballe a xornada completa. Doutra banda, os concellos poderán contratar a técnicos superiores en Animación de Actividades Físicas e Deportivas e facelo, tamén, a xornada completa.