A Asociación de Empresarios de Ribeira presentou este 16 de abril as actividades encadradas na Campaña Día da Nai 2021, dirixidas a dinamizar o comercio local e, tamén, recoñecer e premiar a fidelidade das veciñas e veciños que apostan polos establecementos de proximidade. O miolo da campaña é un sorteo dirixido a todos os clientes que merquen e consuman nos establecementos asociados participantes na iniciativa. Quen participe, que deberá ser maior de idade, poderá facelo de balde e sen contraprestación algunha.
Segundo fixo saber o presidente da asociación, Francisco Martínez Gude, o “obxectivo fundamental da campaña é incrementar as vendas e incentivar o consumo no pequeno comercio retallista e hostalería de Ribeira”. Na presentación participou a concelleira María Sampedro.
A promoción realizarase entre as compras e consumicións feitas desde o día 19 de abril ao 2 de maio de 2021. A forma de participar será mercando e consumindo en calquera local socio e subindo o tícket á web da asociación.
O sorteo realizarase o luns 3 de maio ás 13.00 horas no local da Asociación de Empresarios.
Na campaña poderán participar tódolos consumidores maiores de idade, que se rexistren a tal efecto seguindo as indicacións das bases e que realicen unha compra ou consumición por calquera importe nos establecementos adheridos á iniciativa de promoción, “sempre e cando a compra se realice durante as datas de duración da campaña”. Ou sexa, do 19 de abril ao 02 de maio de 2021. As persoas participantes deberán en todo caso conservar o tícket da compra ou consumición realizada, a fin de dispoñer dun xustificante.
A realización do sorteo celebrarase de xeito telemático mediante un código programado que elixirá aleatoriamente aos agraciados de entre tódolos participantes, ata conseguir o gañador do premio e un suplente.
O consumidor/cliente/usuario rexistrado na campaña, poderá optar aos premios con varias participacións se é o caso, pero, segundo se especifica nas bases, “unha vez agraciado cun premio xa non poderá optar a ningún máis na mesma edición; neste caso non poderá ser a mesma persoa a premiada e o suplente”.
O premio
O premio desta campaña para a persoa participante será unha tarxeta bancaria con un importe de 1.000€ menos a retención dos impostos obrigatorios, o asesoramento dun/unha personal shopper e un coche con chofer para levala aos establecementos que elixa para gastar o premio. Este ten que ser gastado o día 29 de maio nos establecementos participantes. O importe deste premio deberá ser investido nos tres sectores que participan nesta campaña: comercio, hostalería e restauración. Para repartilo entre varios participantes, como máximo a persoa premiada pode gastar 150€ en cada un dos establecementos seleccionados para gastar o premio.
