A Asociación Anedia doa libros dos Bolechas sobre a diabetes á Biblioteca de Ribeira

O Día do Libro trae consigo moitas actividades e iniciativas moi interesantes de cara ao progreso da sociedade. Desta vez, a Asociación Anedia (Asociación de nenos, nenas e xente nova con diabetes) vén de mostrar o seu interese e preocupación por esta doenza a través dunha doazón á Biblioteca Municipal de Ribeira dunha serie de libros infantís sobre a diabetes.

Trátase duns exemplares de Os Bolechas titulados Os Bolechas saben o que é a diabetes. Os volumes pretenden contribuír a sensibilizar á sociedade sobre unha enfermidade autoinmune coa que hai que aprender a convivir cada día. As dúas integrantes da entidade, Mónica García e Emma Sobrido foron as encargadas de entregar os libros á concelleira de Educación Juana Brión, nun acto no que destacaron a importancia de “apoiarnos mutuamente e tirar con forza cara adiante, xa que ninguén está só”.