A veciñanza maior de 50 anos da Pobra do Caramiñal desfrutará dunha atractiva oferta formativa por cuarto ano consecutivo grazas ao programa Camiños de Coñecemento e Experiencia fomentada pola USC (Universidade de Santiago).
Desta vez, o programa transcorrerá no mes de abril e focalizarase en tres novas temáticas: patrimonio industrial, música clásica galega e astronomía. Cada un destes ámbitos constará dunha sesión teórica e outra práctica a cargo do persoal docente asociado ó proxecto.
En primeiro lugar, o 19 de abril, terá lugar o seminario Revisando a historia dende unha perspectiva local, da man de Raúl Soutelo Vázquez e José Manuel Vázquez Lijó. O día 26 volverán cunha visita ao Museo Anfaco da Conserva, en Vigo.
Doutra banda, o 21 de abril será a quenda de Laura Touriñán Morandeira que presentará o seminario Marcial del Adalid y Gurrea (1826-1881). Na xornada seguinte levarase a cabo a parte práctica.
Por último, será José Ramón González Romay o encargado de impartir o coloquio O sistema solar e a Vía Láctea no día 28, que proseguirá no día 30 coa súa parte práctica a través dunha observación astronómica nocturna.
“É unha metodoloxía participativa e aberta que o ano pasado funcionou moi ben”, indicou a edil Patricia Lojo. Ademais, o rexedor Xosé Lois Piñeiro agradeceu ás entidades que fan posíbel esta actividade, da cal destacou que “tivo moi boa acollida dende o principio”.
Todas estas xornadas de formación terán lugar en horario de 16.30 a 18.00 horas no Auditorio do Museo Valle-Inclán de acordo ás medidas sanitarias por mor da COVID-19. Así, tódolos interesados poderán formular a súa inscrición na casa da cultura Raquel Fernández Soler, co teléfono 981831 545. A matrícula é de balde e ten un límite de 25 prazas.
