O Concello de Boiro celebrou este 15 de marzo unha nova sesión semanal da Comisión de Seguimento da Evolución da COVID-19. Segundo fixeron saber os integrantes do equipo de traballo, o número de novos casos positivos e positivos activos segue en descenso, a raíz dos datos publicados pola Consellería de Sanidade. Con todo, indicaron, “cómpre seguir mantendo todas as medidas para garantir que o nivel de contaxios se manteña á baixa”.
Tamén se fixo saber que os operarios de Protección Civil continúan realizando tarefas de limpeza e desinfección de parques infantís e mobiliario público, así como atención a calquera necesidade derivada da COVID-19. Amais, os axentes da Policía Local continúan co control e vixilancia da poboación para garantir que se cumpran as medidas e restricións decretadas polas autoridades sanitarias. Na última semana os axentes interpuxeron un total de 8 denuncias, 3 delas polo uso indebido de máscara; 2 por fumar na vía pública e 3 por incumprir o horario do toque de queda.