Os días pasados foi dado a coñecer o programa definitivo da segunda edición do Festival Virtual do Libro de Galicia (FLIV21). A axenda vén finalmente con 30 actividades e máis de 70 persoas convidadas para, en palabras da organización, informar e debater sobre o último ano da cultura do libro en Galicia e sobre algúns dos fitos principais do que “sucedeu, está sucedendo e sucederá na cultura literaria galega”. Celebrarase entre os días 26 e 28 de marzo. O fío temático do festival será o pulo das nosas creadoras e creadores na adversidade da pandemia. Tamén se emprestará unha atención especial ás grandes celebracións deste 2021: a de Pardo Bazán e de Xela Arias, pasando pola Álvaro Cunqueiro, e a conmemoración do Día Mundial do Teatro. Esta segunda edición do FLIV conta co apoio da Deputación da Coruña e da Secretaría Xeral de Política Lingüística. O festival poderá seguirse a través do portal de seu.
No devandito portal web celebraranse as actividades nos seus distintos formatos: charla, mesa redonda, conversa ou debate, as presentacións de libros por parte das respectivas editoras a través dos seus representantes e tamén as intervencións teatrais.
A co-directora do festival, Anna R. Figueiredo salienta a oportunidade que representa esta cita virtual, “nun momento no que a meirande parte dos actos culturais seguen a contar cun aforo limitado, ofértase a información do que pasou no mundo cultural, o que acontece e o que se agarda a disposición xeral no portal virtual e durante un ano natural”.
O programa completo da FLIV ofrecerá arredor de 30 actividades entre as que salientar: a charla de Marilar Aleixandre para falar de Emilia Pardo Bazán; Chus Nogueira, que o fará sobre Xela Arias; e as autoras que debaterán sobre literatura infantil e xuvenil como “unha literatura afoutada”, Nee Barros, Irene Fernández, Antía Yañez e Eva Mejuto.
Tamén haberá un debate dedicado a narrativa e á memoria persoal no que participarán, Xesús Fraga, Suso de Toro e Berta Dávila, moderados por Esther Gómez. Ademais destes, Armando Requeixo falará de Cunqueiro e Xosé Ricardo Losada Diéguez falará de Faustino Rey Romero.
Figueiredo explica que a intención desta segunda edición do Festival Virtual do libro e a literatura en galego é “procurara conexión entre as creadoras e creadores da cultura en galego eo público en xeral establecendo unha conexión directa para a revisión do ano literario tras a pandemia e os camiños que se deitan agora ante nós”.