O Concello de Boiro comparte cos hostaleiros as súas medidas principais para reactivar a economía local

O Concello de Boiro reuniuse este xoves 4 de marzo do sector local da hostalería. O obxectivo da xuntanza foi determinar o control das restricións e as medidas de reactivación para impulsar o despegue económico tralos treitos máis críticos da pandemia. Participaron o alcalde de Boiro, José Ramón Romero; o tenente de alcalde, Luís Ruiz; e o concelleiro de Comercio e Industria, Marcos Fajardo. Entre outras cousas, acordouse solicitar ao Goberno galego unha nova metodoloxía para a colocación das mesas nos locais.

Na reunión estiveron presentes varios representantes do sector hostaleiro do municipio integrados na Asociación Boirense de Empresarios e tamén os axentes da Policía Local.

Tratáronse medidas que se recollen no Plan de Hostalaría Segura da Consellería de Sanidade para a apertura dos locais e o control das medidas de seguridade, como son o control da capacidade máxima permitida.

Na xuntanza acordouse presentar un escrito conxunto da ABE e o Concello de Boiro á Consellería de Sanidade para a revisión do punto sexto do Plan, o relativo á colocación de mesas, para que se axuste mellor á capacidade máxima do local, deixando colocar maior número de mesas respectando sempre a capacidade máxima e a separación.

O Goberno local presentou tamén aos representantes da hostalería as medias económicas nas que se está a traballar para promover a recuperación económica do municipio. En concreto, falou das dúas medidas principais: por unha banda subvencións directas para os sectores máis afectados polas restricións e, pola outra, un programa de bonos para potenciar o consumo no comercio local.

Na xuntanza os representantes dos hostaleiros tiveron oportunidade de formular as súas dúbidas en canto ás restricións e tamén de transmitir ao Concello as necesidades e demandas do sector neste momento para seguir traballando en conxunto pola recuperación económica do municipio.