Regueifiñas 2021, o certame de debate escolar dirixido a alumnado de centros galegos de 4º da ESO e 1º de bacharelato, mantén aberto o prazo de inscrición ata o vindeiro 22 de marzo. Esta iniciativa, que chega xa á súa terceira edición, consta de dúas fases: competición inicial e debate final.
Os centros que desexen participar enviarán un vídeo onde dous equipos fagan un debate sobre un tema proposto co formato de Regueifas de Ciencia. O xurado visualizará todos os vídeos recibidos e escollerá aos dous mellores equipos de entre todos os participantes para competir na final. Este debate pode realizarse utilizando plataformas de videoconferencia ou similares. O debate final entre os dous equipos finalistas, será retransmitido por streaming e realizarase telematicamente.
Os vídeos enviaranse ao enderezo electrónico info@regueifas.org e incluirase unha listaxe dos nomes completos das persoas participantes, indicando os nomes do equipo a favor e do equipo en contra, o curso, o centro e o nome e contacto da profesora ou profesor (correo electrónico e teléfono) promotor da iniciativa. Cada correo recibido será respondido cunha confirmación de lectura por parte da organización, o que suporá que o equipo é candidato a gañar o certame. As bases da convocatoria poden consultarse nesta ligazón.
