Cinco persoas foron detidas pola Policía Nacional durante o rexistro de tres narcopisos nas primeiras horas desta madrugada. As operacións tiveron lugar nas rúas Cervantes e Romero Ortiz de Ribeira. En dous puntos destas rúas levouse a cabo un amplo despregamento co fin de tratar de desmantelar dous narcopisos, que se completou cunha terceira intervención nun edificio da rúa Rosalía de Castro. O resultado foi a detención de cinco persoas e a incautación dunhas 150 papelinas de cocaína e heroína.
Os lugares eran puntos de venda de droga recoñecidos pola policia da cidade,e denunciados por veciños que deron a voz de alarma . Ao parecer, durante as últimas semanas mesmo houbo denuncias relativas a tentativas de roubos e atracos nas mencionadas rúas así como nas súas inmediacións.
O rexistro dos tres inmobles, dúas casas e un piso, concluíu coa detención de catro persoas acusadas de tráfico de estupefacientes. Trátase de individuos cun amplo historial delituoso, no que figuran arrestos anteriores tamén relacionados coa venda de drogas. Ao parecer, dedícanse ao tráfico a pequena escala, fornecendo de papelinas aos consumidores da zona. De feito, os axentes, que contaron coa axuda dunha unidade canina, atoparon nas vivendas pequenas cantidades de cocaína e heroína preparada para a súa entrega. Os axentes da Policía Nacional practicaron unha quinta detención. Neste caso, o arrestado está acusado dun delito de furto.
