O Concello de Ribeira vén de licitar dúas novas iniciativas para renovar, por unha banda, as luminarias da rúa Rosalía de Castro e, por outra, as das rúas de Lugo e Rosalía de Castro, ambas enclavadas no entorno do Consistorio.
A intención desta intervención dupla é mellorar a iluminación nestas vías substituíndo as luminarias actuais por outras de maior eficiencia “acordes co seu carácter preferentemente peonil”, informou o Concello, engadindo que os contratos inclúen a desmontaxe e retirada das luces actuais e o subministro e instalación das novas: 60 no caso de rúa Galicia, 4 na rúa Lugo e 24 de Rosalía de Castro, todas elas cunha cualificación enerxética A, a de maior eficiencia segundo a gradación existente.
A actuación na rúa Galicia ten un orzamento de licitación de 39.204 euros, IVE incluído, e un prazo de execución dun mes. A das rúas Lugo e Rosalía de Castro, de 18.295 euros e un mes. Ambas están enmarcadas no Plan Provincial de Cooperación ás Obras e Servizos de Competencia Municipal (Plan Único de Concellos) POS+ adicional 2/2020.
O prazo de presentación de ofertas remata nos dous casos o 12 de abril á medianoite. As propostas débense presentar a través do Sistema de Licitación Electrónica de Xunta de Galicia (SILEX).
