O Concello de Outes convocou a edición 25 do seu histórico e prestixioso premio de poesía, o Certame de Poesía Francisco Añón, unha iniciativa que responde ao obxectivo fortalecido de “promover os valores creativo-literarios da nosa lingua”.
O premio, que leva o nome do escritor máis célebre da literatura local (Francisco Añón foi un dos grandes autores do Rexurdimento e, como tal, un dos principais artífices da posta en valor das nosas lingua e literatura logo dos longos anos de esquecemento dos séculos escuros), ten aberto neste intre o prazo para a presentación de traballos, que poderán enviarse até o 5 de abril.
É un certame aberto ao público en xeral.
Quen queira consultar polo miúdo as bases pode facelo na web do Concello de Outes, en formato PDF.
Inclúense media ducia de categorías:
· Categoría A: para crianzas de 6 a 7 anos.
1º Clasificado: vale de 150 euros en libros e publicación da obra gañadora.
Accésit: publicación da obra.
· Categoría B: para nenas e nenos de entre 8 e 9 anos.
1º Clasificado: vale de 180 euros en libros e publicación da obra galardoada.
Accésit: publicación da obra.
· Categoría C: para nenas e nenos de entre 10 e 11 anos.
1º Clasificado: vale de 210 euros en libros e publicación da obra galardoada.
Accésit: publicación da obra.
· Categoría D: para rapazas e rapaces de entre 12 e 14 anos.
1º Clasificado: vale de 240 euros en libros e publicación da obra galardoada.
Accésit: publicación da obra.
· Categoría E: mozas e mozos de 15 a 17 anos.
1º Clasificado: transferencia bancaria por valor de 480 euros e publicación da obra.
Accésit: publicación da obra.
· Categoría F: maiores de 18 anos.
1º Clasificado: transferencia bancaria por valor de 1.500 euros e publicación da obra gañadora.
Accésit: publicación da obra.
