O Centro de Información ás Mulleres e o Concello de Outes achegan nesta Semana Santa o Campamento Tempo de Pascua. O programa desenvolverase no CEIP Plurilingüe de Outes entre o 29 de marzo e o 5 de abril, en horario de 8:00 a 16:00 horas. As familias poderán acudir ao campamento en horario completo ou incorporarse unicamente das 10:00 ás 13:30 horas. As nenas e nenos que permanezan toda a xornada, terán a posibilidade de almorzar e xantar alí, sendo as familias as encargadas de levar os alimentos.
Con todo, as prazas ofrecidas son limitadas. O prezo establecido é de 15 euros en total, aínda que existen exencións e bonificacións por necesidade económica ou por ser varios irmáns. Ademais, o campamento desenvolverase seguindo as medidas COVID – 19 establecidas polas autoridades competentes.
Os interesados deberán entregar a seguinte documentación: unha copia da declaración da renda do ano 2019 e unha fotocopia do libro de familia e da tarxeta sanitaria do menor ou menores. No referente ás solicitudes, estas deberán presentarse de xeito telemático a través da sede electrónica do Concello de Outes ou presencialmente no Centro de Información ás Mulleres.
