O Concello de Boiro executa obras para a mellora de beirarrúas na praia
de Barraña. A actuación, que se leva a cabo con cargo ao POS adicional 2019
da Deputación Provincial da Coruña, vén de mellorar a accesibilidade do tramo
da Avenida de Compostela que transcorre a carón do estuario do río Coroño.
Esta mañá chegou o mobiliario urbano que se vai colocar no espazo para
finalizar a obra.
O alcalde, José Ramón Romero, e o concelleiro de Urbanismo e Obras,
Luís Ruiz, visitaron esta mañá o lugar da obra para presenciar a chegada dos
bancos do mobiliario urbano. Trátase dun total de 10 pezas realizadas en
formigón branco que levan incorporadas bancadas con respaldo, de aceiro
inoxidable e acabado en madeira.
Con esta actuación véñense de adaptar as medidas para asegurar a
accesibilidade universal nun espazo público, garantindo a autonomía das
persoas favorecendo a igualdade de oportunidades para toda a cidadanía,
especialmente para as persoas con discapacidade. O proxecto a executar une
a praia, o paseo do Río Coroño e os servizos da contorna do estuario,
adaptando o espazo á normativa vixente en materia de mobilidade.
Actuouse nun tramo de 270 metros na marxe sur da Avenida de
Compostela que percorre o pinar do Estuario do Rio Coroño. As beirarrúas que
había no lugar presentaban un estado de deterioro, polo que era preciso facer
unha renovación das mesmas, ademais de adaptalas á normativa actual en
canto a accesibilidade, así como a renovación do alumeado e a dotación de
espazo de novo mobiliario urbano.
