En Boiro celébrase o 8-M con exposicións, teatro e a lectura dun manifesto

O Concello de Boiro celebrou esta mañá un acto na Casa Consistorial para conmemorar o 8-M, o Día Internacional da Muller. En concreto, inaugurouse a mostra Muller, tradición e baile en Boiro e procedeuse á lectura do manifesto institucional por parte das representantes das asociacións que participan na exposición.

Marta Saavedra, de Abeloura; Isolina Sieira, de Nunca é Tarde; Concha Rodríguez, de Xilbarbeira; e Marisé Muñiz, de Pedra da Aroña, foron as protagonistas da lectura do manifesto, xunto co alcalde, José Ramón Romero. No acto estiveron tamén presentes máis concelleiros do Goberno e corporación municipal.

Ademais desta mostra, que estará exposta durante todo o mes de marzo no andar baixo da Casa Consistorial e que logo irá rotando por todos os centros municipais, o Concello organizou esta mañá un espectáculo de teatro para os máis cativos: Historias de Cinema, de Raquel Queizás, que se retransmitiu en directo para todos os centros educativos.

A programación continúa durante todo o mes con máis exposicións: Senlleiras da entidade Unión de Muchachas pode verse dende hoxe no Centro Social de Boiro e na Casa da Cultura estará exposta durante todo o mes As mulleres da nosa vida. Dende o CIM de Boiro e o departamento de Cultura tamén se van levar a cabo nos centros educativos charlas e contacontos sobre igualdade.