A área de Xuventude de Boiro quere fomentar o máximo diálogo coa mocidade local para coñecer as súas principais demandas e necesidades. Por esta razón, está a desenvolver unha ferramenta de participación para a mocidade do municipio que amais de ser unha canle para que a poboación xuvenil achegue as súas propostas, sexa tamén un recurso de comunicación co Concello.
Asi, dende a páxina web da Oficina Municipal de Información á Xuventude (OMIX) de Boiro vén de pórse en funcionamento un buzón de suxestións cunha enquisa para coñecer máis a fondo o que a mocidade boirense opina sobre as posibilidades e potencialidades de Boiro, así como as carencias que consideran sobre infraestruturas, programas municipais ou recursos.
Xunto con esta actividade estabse levando a cabo tamén entrevistas e enquisas a persoas que pertencen a colectivos determinados ou organizacións culturais ou artísticas, para recadar tamén información máis específica. O proxecto, impulsado polo departamento de Cultura, inclúe tamén visitas a centros educativos para realizar entrevistas con profesorado e persoal de orientación e organizar grupos de traballo para traballar de maneira directa.
Todo este proceso poderá seguirse no blog da OMIX, onde está xa dispoñíbel o cuestionario para que a mocidade boirense poida facer chegar a súa opinión e poder levar a cabo iniciativas e actividades adaptadas ás súas necesidades.
