O Concello de Boiro iniciou as obras de renovación de beirarrúas na zona de Espiñeira. O obxectivo desta actuación é a mellora da seguridade tanto de condutores e viandantes así como da accesibilidade.
As obras permitirán acondicionar o tramo de beirarrúas que leva ao IES de Espiñeira, unha zona moi transitada tanto polos estudantes do centro de ensino como de vehículos pesados e turismo para acceder ao polígono industrial.
A actuación será executada con fondos propios e persoal municipal, que se encargará de dotar á zona de beirarrúas accesibles, pasos de peóns elevados con redutores de velocidade, renovación do alumeado público, canalización de auga e mellora da sinalización viaria e das paradas de autobús existentes na contorna.