O Concello de Boiro segue traballando para construír no municipio unha
residencia publica para a terceira idade e mantendo contactos para que esta se leve a cabo. O alcalde, José Ramón Romero, mantivo unha xuntanza por videoconferencia co Xerente do Consorcio Galego de Servizos de Igualdade e Benestar para avanzar nesta demanda histórica do municipio.
O xerente trasladoulle ao alcalde o traballo que dende o Consorcio están
facendo neste sentido e tamén que, nos vindeiros anos, salvo que se produzan cambios so se van construír en Galicia as sete residencias públicas proxectadas nas sete grandes cidades. O alcalde puxo a disposición da xerencia do consorcio os terreos cos que o Concello conta, tanto no núcleo urbano, na rúa Manuel María, como na finca de Goiáns.
O xerente do Consorcio informou ao alcalde das distintas modalidades
de xestión que se están levando a cabo noutros Concellos e mostrou o seu
compromiso de colaborar coa administración local no asesoramento técnico e xurídico dos proxectos para a residencia da terceira idade en Boiro. O alcalde, José Ramón Romero, manterá nas próximas semanas contactos cos alcaldes doutros Concellos que están a levar a cabo proxectos deste tipo en materia de xestión nas distintas residencias públicas.
O obxectivo do goberno local é que se faga unha residencia pública en
Boiro, que conta cunha poboación aproximada de 19.000 habitantes dos cales un 14’4% son menores de 64 anos. Aumenta o envellecemento e redúcense os nacemento, polo que a porcentaxe de persoas maiores aumenta en comparación coa xente moza.
