Boiro comeza a semana en situación estábel e con nivel medio-baixo de restricións

O Concello de Boiro celebrou este luns 22 de marzo unha nova sesión de traballo para avaliar a situación epidemiolóxica do termo municipal e facer balance as actuacións recentes para pórlle freo á pandemia no ámbito local e comarcal. Segundo se fixo saber (reflectindo datos da Consellería de Sanidade), o número de novos positivos e positivos activos “mantense estábel”, polo que o nivel de incidencia no municipio mantense en niveis reducidos (Boiro, polo tanto, continúa no nivel de restricións medio-baixo).

Respecto dos traballos desenvolvidos para frear os contaxios, explicouse que os operarios municipais de Protección Civil continúan coas limpezas e desinfeccións (abranguendo parques infantís, mobiliario urbano e espazos concorridos para evitar que se propaguen os contaxios) e que o Concello decidiu ampliar a capacidade máxima do auditorio da Casa da Cultura ata o 30% permitido, xa que ata o de agora os espectáculos estaban limitados a 50 persoas.

A Policía Local de Boiro mantén as medidas de control para coidar que se cumpran as restricións. Durante a fin de semana só se interpuxo unha denuncia por incumprimento de capacidade máxima nun local.