Boiro acollerá unha xornada Oportunidades de emprego no rural galego, á que asistirá o alcalde, José Ramón Romero, e Francisca Gago, da Asociación Deloa, entidade que organiza a iniciativa.
A xornada contará ca exposición de diferentes experiencias prácticas no sector agroalimentario da man da Comunidade de Montes de Baroña, fogar do Santiso e A Meixoeira. Ademais informarase sobre o taller Emprégate en Verde, que foi posto en marcha mediante un convenio entre a Escola de Organización Industrial e a Asociación Deloa, dirixido a persoas de entre 16 e 29 anos. A iniciativa contará cun taller práctico impartido por Margarita Fraga, directora de CULTIGAR.
Oportunidades de emprego no rural galego, que estará dirixida polo xornalista Manuel Cruz e que contará coa actuación do grupo Os Monifates, terá lugar o vindeiro venres 12 de marzo ás 18:00 horas no espazo Leñaverde do Centro Social de Boiro. Así, tódolos interesados en asistir deberán formular a súa inscrición a través da web de Deloa.