Amicos celebra o Día Mundial do Síndrome de Down achegándonos a historia do noiés Luis Salgado

Este domingo 21 de marzo celébrase o Día Mundial do Síndrome de Down e a Asociación Amicos non quere deixar pasar a ocasión de conmemorar a xornada ao tempo que reivindica a plena inclusión social e laboral e as importantes capacidades deste colectivo. As celebracións de Amicos teñen un protagonista concreto: o compañeiro da asociación Luis Salgado, cuxa vida (coas súas dificultades e os seus moitos logros) poderemos ver o domingo no audiovisual A Historia de Luis, achegado por Amicos.

Os acontecementos vitais de Luis, natural de Noia (aínda que nacido en Caracas, Venezuela), son relatados polos seus familiares, entre os que se contan o seu irmán, a súa tía e as súas curmás, que contan os moitos obstáculos que tivo que salvar na súa nenez e na súa xuventude, ao que se engade o feito de ter perdido máis tarde aos seus pais: “Os seus pais faleceron, a súa nai morreu hai moi poucos meses, vive co seu irmán e tenos a nós, as súas e a súa tía, que é con quen comparte o seu día a día”, explica no vídeo Mª Inés Pérez, a súa curmá, que relata tamén o duro golpe que supuxo a enfermidade e o falecemento da súa nai.

No audiovisual, a súa curmá pequena Lucía Castro, con tan só once anos, é consciente que seu curmán ten síndrome de Down, pero que este feito non o fai diferente: “É o meu primo como calquera outra persoa”, afirma a menor da familia.

Polo que se refire ao tempo presente, o vídeo cóntanos como é o día a día actual de Luis, cos seus 39 anos e coas súas inquietudes (como soñar con ser avogado e xogar de maneira independente as súas afeccións favoritas, como o fútbol).