O Concello de Boiro presentou na mañá deste 3 de febreiro a publicación Entroidos populares. O enterro do óso en Abanqueiro, recuperando así os Cadernos Culturais como motivo dos festexos do Entroido.
Esta iniciativa naceu fai máis de tres décadas, cunha colección propia editada polo Concello de Boiro a través de cadernos divulgativos sobre o patrimonio arqueolóxico do municipio.
Coa publicación O enterro do óso de Abanqueiro retómase a tradición, coa que se pretende seguir cunha liña sobre a recuperación da memoria histórica. A obra tratará sobre o Entroido popular máis antigo que existe en Boiro, e que data de fai máis de 100 anos, co enterro do óso de Abanqueiro.
A idea parte da educadora social Sara Roo, que está a desenvolver seu proxecto sobre a recuperación da memoria arredor do enterro do óso. Tódalas persoas que queiran aportar información, fotos ou documentación sobre o Enterro do óso de Abanqueiro, poden poñerse en contacto a través do enderezo electrónico centrosocial@boiro.org, ou acudir ao Centro Social con cita previa.
