O Concello da Pobra vén de facer balance da actividade recente do punto limpo en materia de xestión, recollida e tratamento sustentábel de refugallos. Segundo fai saber a Concellaría do Medio Ambiente, da cal é titular a edil Genoveva Hermo (Nós Pobra), o punto limpo do Polígono da Tomada rexistrou durante 2020 algo máis de 118 toneladas de residuos.
No balance especifícase que a madeira representa o 56% do peso, seguida dos entullos, chatarra, televisións e monitores, aparellos eléctricos, utensilios de frío, voluminosos, lodos de pintura, fluorescentes e envases contaminados.
Medio Ambiente lembra tamén que esta instalación é un lugar onde levar de balde os nomeados desperdicios, en horario de 10.00 a 13.00 horas, de luns a sábado. Ademais, existe un servizo de recollida de voluminosos en puntos próximos aos domicilios mediante un aviso previo no teléfono de contacto 981871808.
Por outra banda, nos dous minipuntos limpos urbanos depositouse durante o pasado exercicio case 1 tonelada de refugallos, dos cales as baterías e pilas constituíron o 60% do peso. Séguenlle os RAEE de pequeno tamaño (cables de móbiles, auriculares etcétera), as lámpadas de baixo consumo, os CD e DVD, os teléfonos móbiles e os cartuchos de impresora.
Un dos referidos colectores atópase fronte ao Consistorio, mentres que o outro sitúase na praza do Emigrante. Trátanse de estruturas verticais con diferentes divisións, onde se especifica a que están destinados cada un. A súa presenza no termo municipal traduciuse en que no xa referido punto limpo do polígono non se rexistrase a entrada deste tipo de residuos.
