O Concello de Outes volverá a celebrar un ano máis o Día de Rosalía de Castro, que ten como data o 24 de febreiro, día do seu nacemento. Desta volta o Goberno local porá en marcha diversas actividades, dende unha exposición con poemas ilustrados polo alumnado do CEIP Plurilingüe de Outes na Casa da Cultura, poemas nos comercios e agasallando cun libro e unha flor a tódolos cativos que pasen ese día pola biblioteca.
As actividades terán como protagonistas aos máis novos, como é no caso dos poemas ilustrados do alumnado do CEIP Plurilingüe de Outes, que nace dunha iniciativa do Servizo de Normalización Lingüística do Concello de Outes. Esta acción servirá para plasmar as obras nos soportes facilitados polo concello co fin de socializar e homenaxear a obra de Rosalía.
Ademais, unha serie de poemas e ilustracións serán seleccionados para distribuílos polos escaparates dos comercios do municipio, e outros tantos estarán dispoñibles a través dunha exposición na casa da cultura da Serra, que será inaugurada o propio 24 de febreiro. Nesa mesma liña, todas as persoas que acudan á biblioteca municipal ese día recibirán o agasallo dun libro en galego e unha flor.
O alcalde de Outes, Manuel González, destacou a importancia da obra de Rosalía por “ser un discurso feminista e inconformista e os debuxos permitirán ver a súa obra desde unha óptica diferente”. Ademais o alcalde explicou a importancia destas actividades xa que “ permite sumar sinerxías positivas e promover o comercio”.