O arquitecto galego Manuel Gallego Jorreto, un dos principais responsábeis de que Corrubedo estea presente nos principais faladoiros da arquitectura contemporánea (foi o artífice da vivenda unifamiliar que preside dende finais dos anos sesenta a praia da Ladeira), vai obter un novo recoñecemento á súa impecábel e sobranceira traxectoria. Trátase do Premio á Traxectoria Profesional que concede a Consellería de Medio Ambiente. Xunto con este galardón, o departamento da Xunta tamén anunciou este mércores que o Premio Galego de Arquitectura 2020 (terceira edición) irá dar á Escola infantil de A Veigadaña no Concello de Mos. Tamén se recoñeceu o Premio Especial á Sustentabilidade á reforma dun edificio existente para 8 vivendas unha oficina e aparcamento no número 11 da rúa Colón en Vigo.
Un arquitecto que comezo a súa andaina visionaria a carón da Ladeira
Manuel Gallego Jorreto, natural do Carballiño, comezou a súa máis que destacada carreira en Corrubedo (Ribeira), a cabalo entre o ano 1969 e o 1970. A súa contribución ao modelo de casa unifamiliar, inserida nos terreos lindeiros á praia da Ladeira (no outeiro que permite a visión das dunas, do Vilar e do Atlántico), foi destacada por múltiples especialistas en arquitectura como un exemplo perfecto de harmonía arquitectónica co medio natural. Segundo fixo saber nunha entrevista recente o propio homenaxeado, “a nosa casa de Corrubedo estaba nun sitio marabilloso e é, sen dúbida, o máis rotundo dos meus edificios, é case unha ferramenta, un periscopio que ergue a cabeza para mirar, que varre o vento por detrás”.
