O alcalde de Boiro, José Ramón Romero, vén de dar positivo en COVID-19. Segundo vén de informar o Concello nun comunicado, o rexedor municipal é un dos afectados por coronavirus no Consistorio, un feito que obrigou a pechar a sede da Administración local. Outra das persoas contaxiadas é tamén a concelleira de Cultura, María Outeiral.
O Goberno boirense engadiu que “todas as persoas con contacto estreito foron chamadas onte a facer un test de antíxenos, sendo o resultado negativo”. Ademais, fixo saber que as autoridades sanitarias decidiron facer esta mañá un cribado de probas PCR. Debido á situación sanitaria, as dependencias municipais van permanecer pechadas ata que se coñezan os resultados das probas e seguir cumprindo os protocolos e medidas indicadas polas autoridades sanitarias.