O Concello de Pobra presenta unha convocatoria de probas de selección para cubrir os postos temporais das brigadas e das obras de mantemento. Así, realizarase un concurso e escolleranse as persoas máis acordes cos postos a desenvolver: de operaria/operario de servizos varios, operaria/operario de limpeza viaria e espazos naturais, operaria/o de xardíns, electricista e condutor/a.
Os aspirantes deberán reunir unha serie de requisitos, relacionados coa data en que remate o prazo de presentación de instancias, ademais dos de carácter especial en función do posto a que se opte. Os traballadores cun contrato dentro do programa PEL dos Concellos da Deputación da Coruña tamén terán, a maiores, que cumprir unhas condicións específicas.
Aquelas persoas interesadas deberán pedir a súa participación mediante unha instancia dirixida ó alcalde, segundo o modelo que consta no anexo I das bases. Os que queiran optar ós contratos subvencionados pola institución provincial, soamente deberán marcalo no escrito.
As solicitudes poderán presentarse a través da sede electrónica municipal ou no rexistro xeral de entrada do Concello da Pobra do Caramiñal, en horario de 08.00 a 14.00 horas. O prazo é de 10 días hábiles despois da publicación do anuncio da convocatoria no Boletín Oficial da Provincia da Coruña (BOP).
As persoas que presenten a súa solicitude nunha oficina de Correos, deberán aportar un sobre aberto para que a instancia sexa datada e selada pola funcionaria/o de Correos antes de ser certificada. No referente a outro rexistro público distinto ó da Administración local pobrense, as persoas solicitantes terán que remitir unha copia escaneada da instancia debidamente selada ou rexistrada ó enderezo electrónico rexistro@apobra.gal.
