Unha saída de vía na AG-11, á altura do punto quilométrico 24, preto de Boiro, obrigou os servizos de emerxencia a interromper a circulación nun dos carrís de acceso á autovía.
O 112 Galicia tivo constancia do accidente ás 14:15 horas cando a propia condutora do vehículo chamou para solicitar axuda. No seu relato, informaba que sufriu unha saída de vía co seu turismo cando circulaba por Boiro, dirección Padrón. Indicaba que se atopaba ben, aínda que algo nerviosa pola situación, e que o vehículo entorpecía a circulación.
Decontado, desde o 112 pasouse aviso aos profesionais de Urxencias Sanitarias de Galicia-061, aos axentes da Garda Civil de Tráfico, da Policía Local e tamén ao servizo de mantemento da vía. Unha vez no lugar dos feitos, os equipos de emerxencia trataron de retirar o turismo sinistrado e, para logralo, procederon a cortar un dos carrís de acceso ata que as condicións de seguridade fosen restablecidas.
Cómpre sinalar que os Bombeiros de Boiro e os membros de Protección Civil tamén foron informados por se fose necesaria a súa colaboración.
