Un operario resultou ferido esta mañá despois de precipitarse desde unha altura cando traballaba nun tellado no lugar da Baiuca, no concello coruñés da Pobra do Caramiñal.
Segundo a información facilitada ao 112 Galicia polos equipos de intervención que acudiron ao lugar dos feitos, o operario estaba consciente pero sufriu feridas de consideración ao caer dunha altura duns oito metros.
O 112 Galicia tivo constancia do suceso ao recibir unha chamada ás 10:00 horas da mañá de hoxe. Así, púxose a situación en coñecemento dos profesionais de Urxencias Sanitarias de Galicia-061, dos axentes da Garda Civil e da Policía Local e tamén dos efectivos de protección Civil da localidade.
