En Boiro retómase a partir do martes o mercado semanal grazas á diminución dos contaxios

O Concello de Boiro retoma a partir do martes 23 de febreiro o mercado ambulante que se celebra de xeito semanal e estaba cancelado temporalmente debido á situación sanitaria na que se atopaba o termo municipal. O Executivo local, dada a diminución do nivel de contaxios, dá luz verde á celebración do mercadiño cun 50% dos postos e “garantindo todas as medidas de seguridade e hixiene”.

O Concello engade que os postos que se van instalar son “os que se colocan decote na marxe esquerda, pegados á mediana da Avenida da Constitución”, e “rotaranse cada semana para que todos os comerciantes poidan retomar a actividade”. O Executivo lembra que os comerciantes están sendo avisados para que o día 23 se leve a cabo a montaxe “de forma áxil e sen incidencias”.

Para garantir as medidas de seguridade e hixiene vanse colocar dispensadores de xel hidroalcólico no espazo do mercado e vaise intensificar a vixilancia policial. Amais, os axentes da Policía Local de Boiro coidarán que non se produzan aglomeracións e se cumpran todas as restricións xerais decretadas polas autoridades sanitarias, así como evitar que se produzan desprazamentos de outros municipios.

O Concello de Boiro lembra “a prohibición de estacionar o martes no treito da avenida da Constitución, na marxe onde se vai instalar o mercado”.

Nas entradas do mercado estarán instalados carteis coas normas hixiénico-sanitarias a cumprir, polo que o Goberno boirense roga a toda a veciñanza “responsabilidade individual para respectar as medidas e previr os contaxios”.