Detidas catro persoas da comarca do Barbanza e esclarecidos 52 roubos na Pobra do Caramiñal

A Garda Civil do Posto Principal de Boiro, en colaboración coa Policía Local da Pobra do Caramiñal, detivo a catro persoas veciñas da comarca do Barbanza na segunda fase da ‘Operación Calasband’ na que se esclareceron 52 roubos nesta localidade.

remitida

A operación iniciouse a raíz do incremento dos roubos no interior de vehículos nesta localidade, o que levou á detención dunha persoa ao ser sorprendida cando tentaba acceder a un vehículo o pasado 7 de febreiro. A Garda Civil proseguiu coa investigación co fin de lograr o esclarecemento dos diversos ilícitos desta índole sucedidos nesta poboación e grazas á “inestimable colaboración cidadá”, os axentes solicitaron información que conduciu, tras a súa análise, á identificación plena doutras catro persoas involucradas nestes feitos, así como noutros posteriores co mesmo ‘modus operandi’.

A Garda Civil detivo na madrugada do venres pasado a dous homes veciños da Pobra do Caramiñal e a unha muller veciña de Ribeira, coñecidos das forzas de seguridade pola súa implicación en ilícitos de diversa índole, como presuntos autores de 50 delitos de roubo e á recuperación de parte dos efectos subtraídos, os cales foron restituídos aos seus propietarios.

Aos homes impútaselles, ademais, unha tentativa de roubo nunha máquina expendedora, na que aínda que non conseguiron subtraer a recadación, produciron danos por un valor de 400 euros; e un roubo con forza nun domicilio habitado no subtraeron 120 euros en efectivo, un anel de ouro e unha hidrolavadora valorada en 800 euros.

Estes tres detidos, xunto coas actuacións realizadas, foron postos este domingo ao dispor do Xulgado de Instrución número 2, que decretou o seu ingreso en prisión.

A Garda Civil no marco da investigación procedeu na mañá deste luns á detención dun veciño da Pobra do Caramiñal como presunto coautor nun dos roubos e cooperador necesario ao facilitarlles refuxio no seu domicilio tras a comisión dos ilícitos.

Así, o balance da operación sáldase con cinco detidos, a recuperación de gran parte dos obxectos subtraídos e o esclarecemento de 52 roubos que, conclúe a Benemérita, “xeraran gran alarma social nesta localidade”.

A Garda Civil continúa coa investigación para a recuperación do resto dos obxectos subtraídos.