A empresa CONGALSA, referente da industria alimentaria con sede na Pobra do Caramiñal, vén de compartir dúas importantes informacións relativas á súa actividade recente e ás innovacións que está a poñer en xogo para acadar a excelencia nos seus produtos, sistemas e servizos. En primeiro lugar, a empresa deu a coñecer os datos principais do seu balance de 2020. Segundo destaca, foi quen de acadar os 101 millóns de euros en 2020, unha cifra que supera en 18 millóns a lograda no exercicio previo. En segundo lugar, a compañía da Pobra informou da identidade da persoa distinguida na oitava edición do Premio Ramón Doval, prestixioso galardón que leva o nome do que foi director de Relacións Externas da empresa emprazada no Polígono da Tomada.
O balance
Como dixemos CONGALSA pechou 2020 cunha facturación de 101 millóns de euros. Esta cifra, que supera en 18 millóns á alcanzada en 2019 explícase sobre todo pola adquisición da firma lusa Sulpasteis, que CONGALSA formalizou en febreiro do ano pasado.
Estes datos foron dados a coñecer a través un vídeo corporativo interno a disposición de todo o equipo de traballadoras e traballadoras, a diferenza do que acontecía noutros anos, nos que a compañía da Pobra facía públicos os seus resultados no transcurso dunha gala anual de presentación de obxectivos para o ano entrante (nesta edición a gala foi cancelada “debido ás actuais restricións sociosanitarias”).
O Premio Ramón Doval
O Premio Ramón Doval, que debe o seu nome ao anterior director de Relacións Externas de CONGALSA (xubilado en 2018), alcanzou este ano a súa oitava edición. O recoñecemento, que ao longo deste tempo converteuse nunha homenaxe á persoa que mellor representa os valores corporativos que a compañía quere promover entre os seus traballadores (compromiso coa empresa, respecto polas persoas, orientación ao cliente externo e interno, eficiencia, integridade e ética empresarial, traballo en equipo, orientación á mellora continua, innovación, actitude positiva e respecto polo medio ambiente), foi dar este ano 2021 a Ana Rey Novío, que forma parte do departamento de Recursos Humanos de CONGALSA. “O máis significativo deste premio”, sinalan fontes da compañía, “é que o conceden os propios traballadores nunha votación efectuada en dúas roldas”.