O Concello de Boiro convoca un certame fotográfico durante o Entroido, co fin de promover o comercio local. O evento realizarase a través das redes sociais e nace como unha alternativa cultural e de ocio ás festas tradicionais destas datas.
Os gañadores recibirán vales de compra para mercar nos establecementos adheridos do municipio. Os premios dividiranse en dúas categorías. Unha delas é para menores de 12 anos, que inclúe un primeiro vale de 100 euros, un segundo de 75 euros e un terceiro premio de 50 euros, ademais de 5 vales por valor de 35 euros cada un. A segunda categoría está dedicada aos maiores de 13 anos e terá varios vales. Un de 175 euros, outro de 125 e un terceiro de 100, a maiores de 5 vales por valor de 50 euros.
Aquelas persoas que queiran participar deberán enviar unha fotografía do disfrace. O traxe debe enfocarse nun momento artístico, cotiá ou tradicional relacionado cos oficios tradicionais, as tradicións propias do Entroido, a reprodución de escenas de obras de pintores coñecidos ou fotografías tomadas en lugares de interese cultural, paisaxístico e arquitectónico.
No concurso poden participar todos os públicos. Soamente hai que enviar a fotografía cunha pequena descrición ao enderezo electrónico comunicacion@boiro.gal. As imaxes serán publicadas no Facebook da Casa da Cultura de Boiro antes do sorteo. O prazo remata o 22 de febreiro.
