O Concello da Pobra, ante a mellora da situación sanitaria e as novas disposicións, retoma a celebración do mercado ambulante a partir deste mércores 24. Iso si, será ao 50% da súa capacidade.
O Executivo local confirmou que os postos rotarán cada semana para “que tódalas e tódolos comerciantes poidan retomar a súa actividade”. Amais, sinalou que “pola aplicación do protocolo fronte á COVID-19 e do control da cabida”, os postos de alimentación e de plantas situaranse diante do Mercado Municipal, mentres que os de téxtil e calzado trasladaranse á praza Alcalde Segundo Durán (praza Maior).
O Concello indicou que todos os postos verán reducido o seu tamaño coa finalidade de que “sexa posíbel garantir a distancia de seguridade” e ningún deles poderá exceder os 8 metros de lonxitude.
Así mesmo, colocaranse dispensadores de xel hidroalcohólico, instalaranse carteis onde se especifiquen as medidas para seguir e estableceranse circuítos de entrada e de saída.
Por outra banda, vaise controlar a cabida máxima na praza Alcalde Segundo Durán. Cando se acade esa cabida, non se poderá acceder ata que outras persoas abandonen o espazo. Ademais, a Policía local vixiará o cumprimento das restricións decretadas e que non se produzan aglomeracións.
As persoas propietarias dos postos deberán contar coa autorización previa do Concello, que informará de que día lle corresponde vir a cada posto.